用户:Richard923888/DC15工作区/大改善/至秋

To Autumn嗰插图

《To Autumn》（《至秋》）系英国浪漫主义诗人吉茨（1795年10月31号—1821年2月23号）嗰一首诗。个只作品嘚1819年9月19号写正，第年发表嘚吉茨嗰诗集里头。《To Autumn》系吉茨嗰“1819年 六大奥德”嗰最晏嗰诗作。话系话1819年佢突即因为个人嗰原因，冇闲去写作诗歌，佢哈系经过一回秋夜嘚Winchester团近嗰散步之后写正《To Autumn》。个部作品也系吉茨嗰诗人生涯嗰完结点，因为佢许时间拕逼得去赚钱，冇可能凭得诗人嗰身份过生活。《To Autumn》刊发后一年多滴子，吉茨就死嘚罗马。

个首诗有三只诗节，每只诗节有一十一行韵文，描述季节嗰进程变化，由作物嗰晏熟到大收再到秋末冬来嗰许几日。诗作通过对秋天嗰拟人化、收获嗰丰产、视听嗰感官，表现出丰富嗰想像力。佢嗰画面同英国画家John Constable嗰田园画作有交集，吉茨自简都话佢散步过后相到嗰作过嗰田好似一幅画。

个部作品时常拕解读系对死亡嗰借喻，也拕认为系吉茨对当年发生嗰彼得卢屠杀嗰回应。哈有人话系吉茨对好几只英国诗人嗰诗作嗰回应，好似拜伦嗰《Childe Harold's Pilgrimage》（车都夏娄都嗰游记），话嗰系对别嗰国家自然美景嗰赞赏；或雪利头年发表嗰《Ode to the West Wind》（西风颂），两者之间有直接嗰对比反差。更假有人话个首诗反映嘚作者对殖民主义思想嗰一种表达。《To Autumn》拕评做英语最精彩杰出嗰短篇诗之一、英语抒情诗最常刊选嗰作品之一。

背景

吉茨创作《To Autumn》前一个月画嗰相

吉茨嘚1819年嗰春天写正佢嗰好几部重要俄打（颂歌）：《Ode on a Grecian Urn、《Ode on Indolence》、《Ode on Melancholy》、《Ode to a Nightingale》同得Ode to Psyche》。过吥5月，佢开始较得创作别嗰形式嗰诗歌，个包括同得佢朋友加室友Charles Brown一下合作完成嗰悲剧诗《Otho the Great》、《Lamia》嗰另半部、接得写冇完结嗰史诗Hyperion。由春至秋个段时间里头，吉茨嗰全部精力都贡献于佢嗰诗歌创作，体裁包括长篇、短篇诗，佢更假俄得自简一日要写正多过15行韵文。有闲佢哈会为得丰富思想去学习Robert Burton嗰《Anatomy of Melancholy》。

话系许年写得许多首诗，但个一整年都吉茨嘚因为经济问题拕舞得头愅紧。佢也拕佢屋里移民美国嗰兄George嗰税务问题分心。1819年9月19号，佢终于住下心完成《To Autumn》。个首诗是佢诗人生涯嗰终结点。佢再也划时间不出佢创作诗歌，只得寻有报酬嗰事做。财务上嗰问题，加上临死嗰精神面貌、个人嗰责任心都舞得佢诗作努力非常艰难。

9月19号个日，吉茨嘚Winchester团近嗰Itchen河边荡。万后日佢写信得佢嗰朋友John Hamilton Reynolds，里头话许时嗰景色影响到佢同得末后嗰《To Autumn》嗰创作。“个下嗰景色几克气，空气几清新。一切都清晰得温和。…我早以冇像个下样欢喜残田过。…啷话盈余嗰田茬相起来都系温柔嗰——咁话许滴子画也系温柔嗰——佢个深刻嗰打动哩礼拜天散步嗰我，我会搦佢来创作。”不系所有吉茨嗰想法都系光明嗰，佢晓得自简九月份要最终放弃Hyperion。故系佢写得Reynolds嗰信里头话佢放弃哩长篇诗，吉茨也冇搦《To Autumn》寄得Reynolds，但佢寄得佢发行者加朋友Richard Woodhouse嗰信含得个首诗，佢嗰日期即拕算做诗作嗰创作日。

等校订过《To Autumn》后，个首诗拕收录嘚吉茨嗰1820年诗作集《Lamia, Isabella, the Eve of St. Agnes, and Other Poems》里头。发行者Taylor跟到Hessey有滴怫佢会受到吉茨嗰1820年诗作Endymion嗰负面影响，为得防止琐嗰口碑，故系发行个部诗集之前删吥哩任何可能舞出争议嗰政治倾向嗰言论。

诗文

《To Autumn》嗰手抄本嗰头页

《To Autumn》嗰手抄本嗰第页

Season of mists and mellow fruitfulness

薄雾嗰季节、丩圆嗰熟果

Close bosom-friend of the maturing sun

（汝系）成熟嘚嗰日头嗰密友

Conspiring with him how to load and bless

（汝俚）密谋嘚啷装车、啷感恩

With fruit the vines that round the thatch-eaves run;

搦得茅屋檐下底嗰葡萄藤。

To bend with apples the moss'd cottage-trees,

屋前嗰老树駄嘚苹果，

And fill all fruit with ripeness to the core;

成熟拕筑进全部果芯；

To swell the gourd, and plump the hazel shells

葫芦膨起、榛壳繌开

With a sweet kernel; to set budding more,

筑出一只馨甜嗰果仁；为得起正多、

And still more, later flowers for the bees,

非常多嗰蜜蜂嗰花房。

Until they think warm days will never cease,

一径舞得佢俚觉得热天永不止息，

For Summer has o'er-brimm'd their clammy cells.

因为夏日老早就实满佢俚嗒粘嗰窠。

---

Who hath not seen thee oft amid thy store?

曷个不系紧相到汝常伴谷仓？

Sometimes whoever seeks abroad may find

外头不间界都得寻到

Thee sitting careless on a granary floor,

汝随意嗰坐嘚禾场上，

Thy hair soft-lifted by the winnowing wind;

汝飘轻嗰发丝拕风吹起；

Or on a half-reap'd furrow sound asleep,

要不（汝）困嘚作完一半嗰田堘上，

Drows'd with the fume of poppies, while thy hook

拕罂粟嗰花香迷醉，汝嗰镰刀

Spares the next swath and all its twined flowers:

拕掟嘚团近嗰犁沟、拕埋嘚花丛肚里：

And sometimes like a gleaner thou dost keep

有时间汝好似捡榖者硬要摮得

Steady thy laden head across a brook;

汝嗰头、跨过小溪；

Or by a cider-press, with patient look,

或者嘚榨果架边上，耐心嗰

Thou watchest the last oozings hours by hours.

花几个钟头眵许滴落下嗰酒浆。

---

Where are the songs of Spring? Ay, where are they?

春歌嘚曷首？咦，人哩？

Think not of them, thou hast thy music too,-

莫想佢俚，汝也有自简嗰音乐，

While barred clouds bloom the soft-dying day,

等横云照出断夜嗰天，

And touch the stubble-plains with rosy hue;

搦作过嗰田擢上玫瑰色；

Then in a wailful choir the small gnats mourn

接得蟆子嗰悲诗班低吟起来

Among the river sallows, borne aloft

嘚河柳里头，一下高

Or sinking as the light wind lives or dies;

一下低，随微风起灭；

And full-grown lambs loud bleat from hilly bourn;

山川传来嗒壮嗰羊羔子高亢嗰咩叫声；

Hedge-crickets sing; and now with treble soft

篱笆下灶马子歌唱；高歌响起

The red-breast whistles from a garden-croft;

红胸嗰知更鸟嘚田园啼叫；

And gathering swallows twitter in the skies.

群燕嘚天上尖叫。

主题

《To Autumn》嗰三只诗节分头描述哩秋季嗰三只方面：成熟、劳作、农闲，对应嗰时间系立秋到中秋再到立冬，另一根平行嗰时间线系清时到下昼到夜边。吉茨利用视觉、听觉嗰描写来表现个滴变化进程，系佢别嗰俄打里头冇采用过嗰。秋天嘚完首诗里头拕拟人化，佢密谋、催熟果实、收获、舞音乐。

头只诗节描述秋天系自然变化、发展、成熟嗰推动力，佢嗰贡献舞得人家以为热天不会完结。个时间因为热和嗰天气，果实仍然成熟嘚、花蕾开放嘚。诗节对变化过程嗰感官描写系：駄、膨、繌。

第二只诗节搦秋天拟人做一只收获着，拕人家相得着不共样嗰装扮进行劳作，为得第年嗰食物储备。劳作嗰举动欠缺直接嗰描述，每只动作都系非常柔嗰。秋天冇斫真嗰收获，而系坐嘚许首、边歇边相。佢拕比喻做一只累伤嗰劳动者，末后哈话秋天好似捡榖者，佢嗰坚毅强调出全诗嗰静态。日上劳作嗰过程都通过下昼嗰磕困、迷醉传达出来：扬榖、困觉、归屋、榨果。

第三只诗节搦秋天、春天嗰声气做比较。秋天表现出嗰声气不净系佢嗰，也系夜里嗰柔和声气：断夜边蟆子嗰低吟、羊羔嗰咩叫。诗歌嗰督尾表现出黑夜嗰降临，死亡也随得年终而来临。嗒壮嗰羊羔子好似葡萄、葫芦、榛果，冬天会拕收获。尖叫嗰群燕准备离开，田野仰上就会荒芜。啼叫嘚嗰红胸嗰知更鸟、歌唱嘚嗰灶马子都系冬天嗰基本象征。诗节里头秋天嗰声气就系生命嗰颂歌。长大嗰羊羔、迁徙嗰燕子暗示嘚春天，即暗示嘚季节嗰循环。

《To Autumn》嗰主题同吉茨1819年嗰蛮多俄打都有联系。好似，《Ode to Melancholy》介绍对生命进程嗰接受，《To Autumn》也重提个只概念。《To Autumn》通过应用想像力展现出一幅死亡嗰画面、一只拕欢迎嗰结局，1819年嗰诗作对个只题材不大涉及。《To Autumn》着力话成熟已经达成，故系成长已经冇有必要，生、死之间已经产生和谐。为得表现个只和谐关系，每只诗节嗰督上都运用两行诗，个标志得诗节之间嗰暂停，也标志得全诗主题嗰延续。《To Autumn》含得理想同得现实之间嗰结合，佢着重描绘秋天嗰原始形象，展现出一只实际嗰天堂。秋天代表得成长、成熟、乃至临近嗰死亡。

《To Autumn》好似吉茨嗰《Ode on Indolence》、《Ode to Psyche》样，为得艺术得帮助社会嗰功能辩护。《To Autumn》描述宇宙之中，自然同得文化系独立嗰两只部分，而自然经过艺术家拕转化做文化，人力通过对自然嗰农业劳作创造文明。艺术家好似作田佬，搦自然变做消费品，供给人民营养。《To Autumn》嗰末尾大量描述歌唱，系话自然让步得文明，即象征得自然、艺术家对社会嗰自我献身。

有人话《To Autumn》尽管拕历史事件间接嗰影响，但佢特试忽略1819年出嗰政治大事。不过又有人话《To Autumn》同许年嗰贝特鲁大屠杀有直接关联，“话《To Autumn》逃避涉及社会暴力嗰主题系有失公道嗰，因为佢清楚嗰谈及死亡。”哈有人话《To Autumn》嗰主题设计英国殖民主义嗰历史背景，因为全诗由温和嗰气氛升级为热带嗰气候。

结构

《To Autumn》拢共有三只诗节，每只诗节有一十一行韵文。吉茨嘚1819年写嗰俄打都系颂歌嗰形式结构，即有三只分隔鲜明嗰段落，分头对应正旋舞歌（strophe）、对旋舞歌（antistrophe）、终结舞歌（epode）嗰传统划分。《To Autumn》嗰诗节又同别嗰俄打不共样，因为佢嗰诗节有一十一行韵文，而不系十行，每只诗节嗰最督韵文嗰前头哈设置一只两行诗。

吉茨接得使用佢嘚1819年春天写嗰许五首诗嗰技巧创作《To Autumn》，除吥有滴方面有差，好似《To Autumn》就省吥话事者、集中处理具体嗰概念。《To Autumn》冇先头诗作嗰戏剧性变化，全诗强调嗰内容由头到督都冇什哩改变，故系个拕人话做系“发展同停止嗰结合”（a union of process and stasis）、“歇嘚嗰能量”（energy caught in repose），吉茨自简都叫佢“驻止”（stationing）。另外，吉茨接连两到运用尢比闩（Ubi sunt）嗰戏剧技法表达出佢嗰忧思，询问拟人化嗰春天嗰所在，“Where are the songs of Spring?”。

《To Autumn》系搦吉茨惯用嗰弱强五歩格嗰格式写成嗰，即一行有五只重音节、每只重音节前头有只轻音节。但吉茨修改个只格式，采用屋大维倒装格式，即一行嗰头上使用重音节前、轻音节后嗰格式，好似“Season of mists and mellow fruitfulness”；吉茨哈使用强强格嗰格式，即相连嗰诗节嗰头行都搦重音节做起头，为得强调问嗰问题：“Who hath not seen thee...…Where are the songs...?”

《To Autumn》嗰韵嗰形式系三只诗节搦ABAB起头，接得分头系CDEDCCE、CDECDDE、CDECDDE嗰押韵结构。末行之前有只两行诗。《To Autumn》有滴子语句类似吉茨早以嗰诗作《Endymion》、《Sleep and Poetry》、《Calidor》里头嗰句式。吉茨特色性嗰使用单音节词，好似“...how to load and bless with fruit the vines that round the thatch-eaves run.”；双唇辅音（b、m、p）嗰使用也加重诗文嗰分量，好似“...for Summer has o'er-brimm'd their clammy cells.”；长元音嗰使用限定住诗文嗰进度，好似“...while barred clouds bloom the soft dying day.”，不过长元音之间始终拕辅音隔开。视觉韵也拕采用，好似“may find[faɪnd] …winnowing wind[wɪnd]”。

《To Autumn》嗰草稿同得印刷本之间嗰差别系因为吉茨提炼过诗文嗰语言，好似佢改“Drows'd with red poppies”做“Drows'd with the fume of poppies”，为得强调嗅觉而不系视觉；增添被动态、过去式，好似改“While a gold cloud”做“While barred clouds”；文字语句嗰强化，好似改“whoever seeks for thee may find”做“whoever seeks abroad may find”。第二只诗节嗰蛮多诗文都拕彻底重写过，特别系许滴合韵不到嗰。哈有滴子细改动系补还草稿里头誺记嗰标点、改变字母大小写。

评论

学者、评论家对《To Autumn》都一致觉得佢系英语最完美嗰诗歌之一。A.C. Swinburne话佢同得《Ode on a Grecian Urn》系吉茨创作嗰俄打里头最接近绝对完美嗰；Aileen Ward话佢系吉茨最完美、最无忧嗰诗作；Douglas Bush话佢结构、体裁、语调、韵律都系无瑕嗰；Walter Evert话佢系吉茨改过嗰诗里头唯一系完美嗰，若系要话滴子吉茨对英语诗歌传统嗰卓越贡献，许就系完首诗嗰绝对完美性，佢嗰只只部分都系非常重要嗰、相互之间也紧密呼应。

起头，对《To Autumn》嗰关注集中得佢系《Lamia, Isabella, the Eve of St. Agnes, and Other Poems》嗰一篇个只身份上。一只匿名评论家嘚1820年6月嗰《Monthly Review》话，“个只作者有丰富嗰想像力、幻想力；佢嗰幻想力嘚《On Autumn》许几行表现得极其丰富，舞得我俚对自然嗰真实性嗰了解过多我俚早以相过嗰任何描述。…若系我俚冇什哩愅嗰话，K先生嗰特长已经超出所有评论能力嗰范围。我俚情愿𠱽得佢莫有许多惊人嗰原创力，莫许欢喜用新颖、古旧嗰句式，莫觉得诗作就净系个个或许个。”但Josiah Conder嘚1820年9月嗰《Eclectic Review》反得话，“头只为得初尝诗作嗰乐趣，自然嗰选择细短篇幅。第二只关于秋天嗰俄打也冇什哩不合嗰内容。”1820年嗰《Edinburgh Magazine》干脆话，“关于幻想、秋天嗰俄打都有巨大嗰意义。”

19世纪中期嗰评论开始赞赏个首诗。1859年10月嗰《National Review》话“《To a Nightingale》、《To a Grecian Urn》、《To Melancholy》、《To Autumn》个四首精致嗰俄打都咁富有深刻嗰思想，描绘嗰画面咁鲜明、有含义。”1865年，Matthew Arnold凭得个首诗话吉茨系好过雪利嗰诗人。1883年，John Dennis话，“《Ode to Autumn》描述带得季节嗰荣光嗰成熟，佢系抒情诗里头最珍贵嗰宝石之一。”1888年《Britannica》话，“个滴子俄打里头有两只最接近绝对完美、可能系人类语言对旷世绝美最胜利嗰成就同得造诣，佢俚系《To Autumn》同得《To a Grecian Urn》。”

20世纪以来嗰评论好似：1904年，Stephen Gwynn话，“吉茨嗰所有俄打里头就作《To a Nightingale》、《On a Grecian Ur》、《To Autumn》个三首。对佢俚嗰评论系蛮艰难嗰，佢俚好似含得诗歌嗰全部魔力。”1920年，Sidney Colvin话“佢冇《To a Grecian Urn》、《To a Nightingale》、《On Melancholy》样指引读者嗰灵魂思想，但总嗰来话佢比别嗰更完整、更无暇。”1934年，Margaret Sherwood话“佢完美嗰表现出原始情感、暗淡思维转化做人性思想个只过程嗰词语。”

1961年，Harold Bloom话《To Autumn》系“英语短篇诗歌里头最完美嗰。”1963年，Walter Jackson Bate话“历代人都觉得佢系英语里头最接近完美嗰诗歌之一。”1973年，Stuart Sperry话“《To Autumn》通过接受我俚经验天生嗰次序感—季节嗰自然韵律，而获得成功。个首诗话都冇话，就必然嗰提出‘成熟即所有’嗰真理，通过深厚丰富嗰暗喻，提出‘成熟嘚秋天’个只简单嗰感知认识。”1981年，William Walsh话“主要嗰俄打里头冇有挑战得正《To Autumn》嗰地位、权威嗰。吉茨生命里头热烈嗰彻底成熟得个首诗里头拕完全嗰实现、强力嗰化身，好似佢信里头辩论嗰样。”1988年，Helen Vendler话“吉茨通过《To Autumn》寻到佢对艺术嗰社会价值最深刻、充分嗰符号。”

1997年，Andrew Motion总结对《To Autumn》嗰评价，末后话“佢系时常拕话系吉茨最…无忧嗰诗作。…要话佢嗰成就嗰最大力量，许就系佢嗰张力系有效、高标准嗰。”1998年，M. H. Abrams话“《To Autumn》系吉茨嗰最督一部艺术要作。个首诗对时间、刹那、死亡嗰从容默许，系发生的吉茨晓得佢嗰寿命不多过两年嗰背景下。”同年，James Chandler话“咁多人都话《To Autumn》系吉茨最伟大嗰作品，许系因为佢有量面对佢短暂一生最野嗰挑战，跟得战胜。”2000年，Timothy Corrigan话“好似别嗰评论家话嗰，《To Autumn》系吉茨最大嗰成就，因为佢改善日常口语嗰英语白话，嘚完首诗里头变得咁有田园魅力。”2008年，Stanley Plumly话“历史、历代都永生会搦《Ode to a Nightingale》、《Ode on a Grecian Urn》、《To Autumn》看做系英语里头最值得收录嗰悲观抒情诗。”

参考

• Abrams M. H. “Keats's Poems：The Material Dimensions”于《The Persistence of Poetry》，Ed. Robert Ryan同Ronald Sharp，Amherst：University of Mass，Press，1998，ISBN 1-55849-175-9
• Arnold Matthew，“Essays in Criticism”，London：Macmillan，1865，OCLC 3012869
• Bate Walter Jackson，“John Keats”，Cambridge，Mass.：Belknap Press of Harvard University Press，1963，OCLC 291522
• Bate Walter Jackson，“The Stylistic Development of Keats”，New York：Humanities Press，1962，OCLC 276912
• Baynes Thomas (Ed.)，“Encyclopædia Britannica”，Vol XIV，Cambridge：Cambridge University Press，1888，OCLC 1387837
• Bennett Andrew，“Keats，Narrative and Audience”，Cambridge、New York同Melbourne：Cambridge University Press，1994，ISBN 0-521-44565-5.
• Bewell Alan. “‘To Autumn’ and the Curing of Space”于《Keats's Poetry and Prose》，ed Jeffrey Cox，634–642，New York：W. W. Norton & Company，2008，ISBN 978-0-393-92491-6
• Blades John，“John Keats：the poems”，Macmillan，2002，ISBN 978-0-333-94895-8
• Bloom Harold，“The Visionary Company”，Ithaca：Cornell University Press，1993，ISBN 0-8014-0622-6
• Bloom Harold，“The Ode To Autumn”于《Keats's Odes》，ed. Jack Stillinger，44–47，Englewood，NJ：Prentice-Hall，1968，OCLC 176883021
• Boey Kim Cheng，On First Looking into Keats' "To Autumn"，Quarterly Literary Review Singapore，Vol. 7 No. 2 2008
• Chandler James，“England in 1819”，Chicago：University of Chicago Press，1998，ISBN 0-226-10108-8
• Colvin Sidney，“John Keats”，London：Macmillan，1920，OCLC 257603790
• Corrigan Timothy，“Keats，Hazlitt and Public Character”于《Challenge of Keats》，Ed. Allan Christensen、Lilla Jones、Giuseppe Galigani同Anthony Johnson，Atlanta：Rodopi，2000，ISBN 90-420-0509-2
• Dennis John，“Heroes of Literature，English Poets”，New York：E. & J. B. Young，1883，OCLC 4798560
• Evert Walter，“Aesthetics and Myth in the Poetry of Keats”，Princeton：Princeton University Press，1965，OCLC 291999
• Flesch William，“Companion to British Poetry，19th Century”，Facts on File，2009，ISBN 978-0816058969
• Fry Paul，“A Defense of Poetry”，Stanford：Stanford University Press，1995，ISBN 0-8047-2452-0
• Gittings Robert，“John Keats”，London：Heinemann，1968，OCLC 295596
• Gwynn Stephen，“The Masters of English Literature”，London：Macmillan，1904，OCLC 3175019
• Keats John，“The Life and Letters of John Keats ed. Richard Houghton (reprint)，Read Books，2008
• Matthews G. M. (ed.)，“John Keats：The Critical Heritage”，London：Routledge，1971，ISBN 0-7100-7147-7
• McGann，“Keats and the Historical Method in Literary Criticism”，MLN 94 (1979)：988–1032.
• Motion Andrew，“Keats”，Chicago：University of Chicago Press，1999，ISBN 0-226-54240-8
• Plumly Stanley，“Posthumous Keats”，New York：W. W. Norton，2008，ISBN 978-0-393-06573-2
• Ridley Maurice，“Keats' Craftsmanship”，Oxford：Clarendon Press，1933，OCLC 1842818
• Sherwood，Margaret，“Undercurrents of Influence in English Romantic Poetry”，Cambridge，Mass.：Harvard University Press，1934，OCLC 2032945
• Sperry Stuart，“Keats the Poet”，Princeton：Princeton University Press，1973，ISBN 0-691-06220-X
• Strachan John，“A Routledge Literary Sourcebook on the Poems of John Keats”，London：Routledge，2003，ISBN 0-415-23477-8
• Vendler Helen，“The Music of What Happens”，Cambridge，Mass：Harvard University Press，1988，ISBN 0-674-59152-6

[[Category:詩]]